Share it

الخميس، 28 أكتوبر، 2010

يوميات بنت مصريه على قدها 35




الاحباط والياس اخو الملل والتجاهل
وبدات الوان الحياه تتغير من بمبى بمبى بمبى وشقاوة سعاد حسنى ودلعها اللى ينعش قلوب الناس كلها لسواد عبدالحليم ورميت الورد طفيت الشمع ياحبيبى والغنوه الحلوه ملاها الدمع ياحبيبى
وبدات الحياه فى عينى تتغير من حياه ملونه بكل الوان الامل والفرحه والسعادة والاحلام الى الابيض والاسود والصورة اصبحت باهته بعد ماكانت زاهيه
لكن مش هااستسلم ولااسلم للفشل ابدا وبكل تصميم اليابان فى حل مشاكلهم وخروجهم من مصيبة هيروشيما اللى وقعت عليهم ودمرتهم بدون اى ذنب زى الجواز مادمر الفراشه الرقيقه لازم اشوف حل ودى حياتى وانا متعوده على النجاح والتفوق دايما بس ساعتها كانت دماغى اصغر واجهل من انى اعرف ان الحياه الزوجيه لايمكن تنجح بفرد واحد فقط مهما كانت قدرات هذا الفرد وخاصة المراه مهما كانت قدراته فلن تستطيع بمفردها ان تصل للنجاح والسعاده بدونه فهو المفروض انه القائد لكن هو ممكن بقدراته يصل بالاسره كلها الى النجاح لانه هو الحصان الذى يجر العربه وفوق كل دا القوامه اللى الرجاله العصرين نفسهم مش عارفين قيمتها ولاالهدف منها ولا انها افضل من صلاحية عضو مجلس شعب
وبدات اقرر انى لازم افكر بشكل مختلف واغير طريقة تفكيرى بدلا من الكتب والعلم وبا فتحه ومحو الاميه والهمس والدلع ووجع القلب دا خلينا نفكر فى حاجه جديده منعشه تجدد الحياه وتقرب بينا احتمال لعلى وعسى ان يكون فيها الشفا وفكرت فى حلم قديم انى اعمل رحله فى اى مكان جميل فى مصر العظيمه وبالفعل طلبت منه اسافر معه الى مكان عمله وبالمره هاتكون سياحه وتغير جو وروحت الازهر والحسين ومعظم الاماكن الرائعه فى مصرنا الحبيبه والهرم والاثار القبطيه والاسلاميه ودى كانت المره الوحيده اللى وافق فيها على السياحه والكلام دا
ملحوظة:
بس التميز الجنسى فى مجتمعنا زياده حبتين يعنى الرجل باشا قوى واخد كل حقوقه وعايش براحته على الاخر ويعمل المصايب كلها وفى الاخر نقول دا راجل ماحدش يقدر يكلمه لكن هى تتحمل المسؤليه كلها وتشوف اخطاؤه وسلبياته ومش ينفع تتكلم وبعدين نسمع انها مفتريه والله عارفه ان فيه زوجات مفترين واكتر بس انا هنا بتكلم عن الصفه السايده فى المجتمعات الشرقية ومصر بالذات ان المراة مدمره نفسيا ومجهدا ومسؤليه وتعانى من كثير من المشاكل مع ان ولا دين ولا اصول بتقول كدا وان المشكله الاكبر ان سنه ورا سنه الموضوع دا بيزيد يعنى رجالة زمان فى مصر غير دلوقتى خالص دول كانوا فى منتهى الاخلاق والرحمه والهيبه والحنيه وكلنا عشنا مع اجدادنا وابأنا وشوفنا هيبتهم اللى لاتتعار ض مع حنيتهم ورحمتهم بالجميع سواء المراه او الاطفال
مع ان الرجل لو فكر لحظة بهدوء ان نفس المشكله ممكن تكون فيها اخته او بنته وبتعانى نفس اللى الزوجه بتعانى منه وليه كل دا مش فاهمه مابلاش كدا وخلينا نتعامل بالمنهج اللى ربنا حطه فى الجزئيه دى ونحب بعض ونعمل حياه حله
واسمعوا احلى كلام عن مصر فيها حاجه حلوه
http://www.youtube.com/watch?v=p0qc0EvHCFU

الأربعاء، 27 أكتوبر، 2010

يوميات بنت مصريه عى قدها 34




ليس كل مايدرسه الطالب ينفعه--تأتى الامتحانات بما لاتحتوى الكتب
===================
بعد كل المذاكره اللى ذكرتهاله والشرح والدروس الخصوصيه وبافتحه با والكسره والضمه وصوت الشحروره اللى اتنبح معانا طول النهار والليل واللى شوفتوها فى الحلقات وكمان عمكوا نزار وكاظم باشا سابونا ومشيوا زعلانين من عدم التقدير ولا تصفيق ولا دباديب حمرا وبيضا من اللى كانت بتترمى على كاظم و مشيوا باحباطهم وكسفتهم دا غير تعبكوا وكل القراء معايا بجد تعبتكوا معايا وبعد اعمال السنه والامتحانات وملف الطالب وطبعااااااااااااااا الامتحانات والتصحيح وبعد الرأفه وحتى الاخ رأفت بجلالة قدره
ولكن النتيجه مش محتاجين اقولكوا خلاص لانها لو كانت زى عبد الحليم مابيقول الناجح يرفع ايده اكيد كنتوا هاتسمعوا التهانى والافراح والليالى الملاح مش المملحه وانتوا قاعدين فى بيوتكم على الفيس بوك الله يقطعه ويقطع اليوم اللى عرفناه فيه
بس حجة البليد ماكنتش مسح السبورة وبس دا تقريبا كان الوندوز كله واقع والماظر بورد حالتها حاله
لان اكتشفت ان شوربة الخضار كمان مجهزه من خضار مرشوش بمبيدات حشريه وكيماويات ومطبوخ بمياه صرف صحى زى الميه اللى كل مصر بتشرب منها وتطبخ منها والاكثر ان الخضار بتاع شوربتى كانوا ضاربينه حقن يعنى خضار غير صالح للاستخدام الادمى زى كل الخضار اللى بنكله فى مصر
المقصود بالمبيدات الحشريه ومياه الصرف وغيره اى عيوب فى الرجل او المراة لايمكن اكتشافها الابالعشره نتيجة الوراثة او التربيه مثل البخل او الخيانه وضعف الشخصية وعدم الرجوله وعدم الطاعه والافترى للمراة وغيره كتير من الاخر اى مشكله نفسيه غير ظاهرة
تخيلوا انتوا حالتى وحزنى والمى ولو كنتوا مكانى وتكتشفوا كل دا
فقلت مافيش مشكله وعملت بنصيحة طنطكوا الشحروره صباح وقلت اعمل ملحق ياجماعه ماهى حياتى تستحق انى اذاكر وادخل معاه دور تانى وعاشر وكمان اعمل ملحق
ودماغى الجباره قالتلى مافيش حل غير انك تدرسى علم وتفهمى علم نفس وتتعلمى الحب والعلاقات الزوجيه من الفلاسفة والعلماء والمفكرين ومن الكتب فى العلوم الانسانيه وعلم النفس
وفعلا طيران على المكتبات وقصور الثقافه والمحاضرات لازم افهم الشخصيه والدماغ ومش طالبه بس غير ان الكومبرص الصامت ياخد دور صغير جدا حتى لو يرد على و نفسى احس انى بكلم حد مش بخبط دماغى فى الحيطه والله خلاص توبت الى الله ولم اطمع فى سماع كلمه حلوه او حب او رومانسيه دا اوبشن مالغى خالص وانا راضيه ولا طالبه نقاش او حوار فى حياتنا ولاتعاون ولامسؤليه وكفايه بس اننا نتواصل ونفهم ونعيش حياتنا لانى كنت حاسه انى لوحدى فى مدينه فاضيه مهجوره ومافيش حد سمعنى والخوف مالينى ونفسى يكون هو ونيسى
بس للاسف كل ماقرا كنت بتوه اكتر وبتعب اكتر وبيصبنى الحزن والتوهان اكتر وفى نفس الوقت كنت اشعر ان المجتمع سجان على كل ماريد ان افهمه ومن اجل حياتى وسعادتى فهذا حق كل انسان ان يعيش ويستمتع بحياته
وبدات اشعر ومن الاخر ان الفراشة اللى كانت طايره فوق السحاب وفرحانه وخفيفه اتربط فى رجلها حجر رشيد بكل رموزه اللى اتفكت واللى ماتفكتش وبالرغم من كدا نور لم تياس ولم تستسلم ورجعت تانى تفكر فى حلول لتستمر الحياه لان لامفر من المؤبد مع وجود سجان قريب وسجان بعيد وتابعوا وشوفوا هاتعمل ايه والحل الجديد
ملحوظة:
لابد على كل مراة ان تتعلم وتدرك عيوب الرجل وماذا ستقبل منها وماذا سترفض منها وهل العيوب ستقف عند العصبيه والصوت العالى والنقد ام ستمتد عيوبه الى الشراسه والبصبصه والبخل والاهمال وضعف الشخصيه والى اى مدى ولا كل يوم هانعيش مسلسل عيوب الزوج او الزوجه كدا مش هاتكون حياه دى هاتكون قبر واحسن ان الواحد يموت من الوضع دا يعنى بلاش الافترا بتاع الستات والجبروت او الضعف بتاع الرجاله
والاغرب من كل دا ان مجتمعنا عامل سجان على ارواحنا وخاصة المراة ليس لها الحق ان تعلن عن مايؤلمها حتى لو كان الزوج دا اختها انا بقول مثلا لان للاسف هذا الامر اصبح شائع ولكن كامن فى اكبر صرف صحى وعليه غطاء من وزارة النقل والمواصلات والطرق والاسكان والتعمير ودول اللى عمرهم ماتفقوا اتفقوا فى الغطاء دا بس عشان مش نقدر نزحزحه خالص ويفضل كاتم على انفاسنا وارواحنا ومش نحل مشاكلنا ونعيس سعدا
وتعالوا اسمعوا صباح وهى عامله ملحق وبتعلم الحب
http://www.youtube.com/watch?v=tLPYpMm0ns4&feature=rec-LGOUT-exp_fresh+div-1r-14-HM

الاثنين، 25 أكتوبر، 2010

يوميات بنت مصريه على قدها 33




البحث عن المراة الاخرى فى حياة الرجل
ولما خلاص خلصت كل محاولاتى من التماس اعذار ومحاولات تلميح وبعدين تصريح ودروس وبطريقة غير مباشرة طبعا حفاظا على الذات الذكوريه العليا وكل دا بدون اى مساعدات من احد لان دا موضوع مش ينفع فيه استعانه بصديق والاهل طبعا حاطين كل الحبر الاحمر على الامور الخاصه مش خطوط حمرا بس
ومش لاقيه حد يسمعنى ولا يرشدنى وكمان زعلانه ان دى هاتكون حياتى كلها دا مش فستان هارميه او جاره هاسيبها او اى حد
دا زوج وشريك واهم حاجه عندى وكنت بحلم بيه وبالبيت والاولاد والسعاده والحب والدفا وادخرت نفسى له فقط ولم اسمح لنفسى ابدا بحتى نظرة لاى رجل قبله ومعقول تكون دى النتيجه
وبدات اوسع الدايره واخرج برا دماغى ماهو الحوار مفقود مع الزوج والاهل لان دا ممنوع والخطوط الحمرا كبيره وبدأت استعين بصديقه واسالها واحكى لها وانا ببكى وكان ردها غريب جدا ولم يختر ببالى وقالت فتشى عن المراه الاخرى فى حياته وخاصة انه مسافر باستمرار ومش موجود او فتشى عن الحب القديم فى حياته ممكن يكون حصل خيانه او هجر او غدر
وتعجبت كثيرا وبدر لذهنى سؤال مهم لاول مره فى حياتى هل ممكن لرجل متزوج ان يعرف امراة اخرى مع زوجته فى الحقيقه كما فى الافلام ؟؟؟؟؟؟
والله سامحونى ياجماعه دماغى كانت بسيطه جدا وخبرتى لم تتعدى والدى المحترم المهاب وبعض الخبرات من الافلام
وكان سؤالى افتش ازاى هو درج مكتبى ولا دولاب المطبخ وكمان كل الكلام اللى قالته مش فهمته خالص كان غريب على سمعى ومش من ثقافتى ولا فى دماغى وهمست لنفسى انى يجب ان الاحظ بس ولكن اكتر من كدا ممكن اظلمه وادمر حياتنا وانا اعقل من كدا
وبدات بهدوء الاحظ الكلمات واسال والملابس والاوراق بس مش تفتيش وربكوا والحق انا فاشله فى عملية المخبر الخاص دى
(يعنى ولا برايفت ديتيكتف ولا بابلك كمان) ومش عارفه هم الزوجات بيفتشوا ازاى ولا بيلحظوا ايه وكمان انا مش بحب كدا ---كل انسان وله خصوصياته بالاضافه انى بحب اللى يعيش معايا يكون بحريته وعلى راحته على الاخر
وكانت النتيجه ان ساعات اقول فيه واحده تانيه ماهو الامور كانت اوفر اوى برضه وساعات اقول لا مش معقول واحده تانيه وانا بكل المواصفات دى ولم تهتز ثقتى بنفسى ابدا هى مين دى اللى ممكن تكون افضل منى بكل مميزاتى وبصراحه بعدت الفكره دى تماما ومخى مش حابب يناقشها احتمال كرامه او عزة نفس او غرور والله مااعرف بس حتى لو فيه واحده تانيه على اسوء الفروض مش عايزه اعرف ولازم احافظ على بيتى ومخى لغى هذا الاتجاه تماما لانه مسافر باستمرا ولو الفكره دى دخلت دماغى ممكن اتجنن وكفايه ان سفره عقبه فى اصلاح المشكله لانى مش عارفه اتلم عليه وادرسه كويس وامتحن وانجح فيه كمان
وفكرت انى اروح لمصر واستعين بيها قصدى الست والدتى ماهى عامله زى مسؤلين مصر مايتحركوش الا لما المصيبه تقع مثلا انقلاب القطر وضحايا وموت ويقولك اصل السبب ان نمله نظرها ضعيف كانت معديه ماشافتش القطر فالسواق عشان يحافظ على حياتها ضحى بركاب القطر عادى جدا وكمان العباره اللى غرقت كان السبب ان واحد عايز يستثمر فى ارواح الناس برضه عادى واللى هربوا بأموال الشعب برضه عادى احنا اللى ناس حاقدين ومنفسنين ومش عارفين نعمل زيهم انا بقه مامتى زى مسؤلين مصر تفضل تتفرج على المشكله ولاتهتم وتخرب الدنيا وبعدين تكتفى بسبب بعيد عنها تماما وتلقى باللوم على الضعيف لانه من البدايه ضعيف وتشوف كبش فدا يشيل القضيه كلها وكان
ومن الاخر رفضت مصر تسمع مجرد السمع وتجاهلت الامر تماما ودا ترتب عليه تراكم للمشكله ودى غلطه كبيره بيقع فيها الاهل من تجاهل او القاء اللوم على الزوجه فقط وانصاف الزوج تماما بحجة انه الرجل وما يعرفوش ان دا بيعقد المشكله اكتر لانها حياه مشتركه وان اول واحد بيخسر هو الرجل من موضوع المجتمع الذكورى دا لان المراة هنا نتيجه لاحباطها وتجاهلها تصاب بنوع من الرفض والعدائية نتيجة لعدم التقدير والاهتمام
وتعالوا شوفوا شاديه عندها مشكله وعايزه حد يحل المشكله مين فيكوا اللى هايتبرع يحل المشكله
http://www.youtube.com/watch?v=tQKwx-46Ft0&feature=related

الجمعة، 22 أكتوبر، 2010

يوميات بنت مصريه على قدها 32




الزوج المبكر نفسيا وفكريا وثقافيا وعمريا (3)
نعمة وقوية وكلها حنية ---- الحلقه دى خفيفه وكلها تهريج عن الاكل والمطبخ والشيفات
بالرغم من غيوم السما لكن بنحاول وكنت كلى أمل وتفاؤل لان دى حياتى وتستاهل انى ابذل كل الجهد
مش كفاية نقول للامير شوربة الخضار على درجة الحرارة المطلوبة وبس لازم كمان نقوله انواع الخضار وحجم القطع فى التقطيع طريقته خطوات الاعداد
ياجماعة كل شيخ وله طريقه وكل واحد وله قهوته فيه اللى بيشربها على الريحة وفيه اللى بيحبها مظبوط وناس عيزاها زيادة دى مزاجات مش دليفرى والسلام لاطعم ولاريحة دا اكل بيتى يعنى تسمتع وتشبع وتتغذى كمان وصحتك كلها تبقى تمام يعنى النتيجة هدوء وانسجام واسترخاء ونجاح فى العمل ودماغ منور بيفكر صح كل دا لو الطبخة اتعملت صح دا نفس بقة مانتوا عارفين موضوع النفس فى الطبيخ المصرى ومشهود للمصريات ان نفسهم فى الطبيخ لاقبله ولابعده ومايقدر على القدرة اللى ربنا نفسهم مظبوط قوى ومسبك وبهاراته تمام
ملحوظة:
قلنا قبل كدا عرفنا ان كل انسان وله بصمه وكلنا عارفين كمان ان كل شيخ وله طريقة
وانا هنا بقولكوا كل بلد ولها اكلها وكل شيف او طباخ وله اسلوب يعنى مثلا الشيف شربينى ياسلام بتاع المسبك والمحشى والدمعه والشيف أسامه دا بتاع العزومات الكبيرة وفنادق العشر نجوم والاستاذة منال العالم الافكار والتقديم والمحتويات وكل حاجة ولما تيجى عند المايستروا منى عامر الله والله على الطعم والثقافه والشياكه تقول اكبر سلام ياجدع ومش عارف تبدا بايه وتسيب ايه وتاخد ايه ومش عارف ايدك رايحة فين وسنانك فين ولسانك بيتذوق ايه انا بس بتكلم عن الاكل ووفنانين الطبخ ماحدش يفهم غلط لانه شرقى خليكوا حلوين
المهم الافضل ان كل واحد مننا يعرف المقادير بالظبط المطلوبة وطريقة العمل اللى هو بيفضلها وكمان الطرف التانى بيحبها وساعتها اؤكد لكم المطبخ فى كل بيت هيكون اسعد مكان فى الدنيا
تعالوا اسمعوا صباح وهى بتعمل محو اميه فى الحب

http://www.youtube.com/watch?v=LOgYGgwJvJM

الخميس، 21 أكتوبر، 2010

يوميات بنت مصرية على قدها 31





الزوج المبكر نفسيا وفكريا وثقافيا وعمريا (2)
أرسل نبيه ولاتوصه ---وقالت نور عايزه من دا
وبعد الامير شارل (من انهاردة اسمة شارل وماتسالوش ليه ) ماشاف صورةالعروسة الاموره اللى نور عايزه تكون زيها ومن تأثير المفعول السحرى للشوربه و بعد مارميت الكوره فى وش حارس المرمى
تقريبا سامحنى انها دخلت فيه جون وكمان ممكن تكون عملت ليه نزيف داخلى فى دماغه ولم يحرك ساكنا فقلت لا لا عادى انا اللى غبيه مش بعرف اوصل المعلومة كويس وانا برضه مش كان ينفع ابدأ بالصورة النهائية اللى عايزه اوصلها كان المفروض اشرح واحدة واحدة وطلعت نفسى الغلطانه وغبيه وهو ياحرام لازم اصبر وافهمه
يعنى قبل ماطلب منه المفعول السحرى للشوربه وقيمتها الغذائية اللى مطرح ماتسرى تمرى عشان قيمتها ومفعولها الفتاك
كان لازم افهم شوربة الخضارمواصفات شوربتى ايه من ناحية اولا درجة الحررة المطلوبة مثلا
و اللى المفروض يكون عليها يعنى يعنى مش يكون بارد ولا بيلسع ويحرق اللسان خير الامور الوسط ورسمت صوره للاحساس اللى عيزاه من شوربة الخضار قصدى درجة الحراره والدفا والحجات اياها دى
ولاحظت حاجه غريبه جدا ان شوربة الخضار مش معايا على الخط خالص ومش متابع بالمره موضوع المواصفات والدفا والحب والجواز فقلت فى نفسى مش مشكله نغير الطريقه وانا اللى اهىء الاسباب والطرق والوسائل اللى تدفع شوربة الخضار يتغير وبكدا هاتكومن الشوربة دى احلى وجبه ماهو اهم حاجة فى الدنيا الامل
واولها لازم تكون شوربة الخضار دافيه طيب اعمل ايه
وبدات افكر فى النار والبوتجاز اللى ها يعلم الدفا لشوربة الخضار طبعا واول بوتجاز فكرت فيه هو اغانى كاظم الساهر واه اه كلمات عمكوا نيزار قبانى وعشت مع الالحان والجمال بس تقريبا شوربة الخضار مالهاش فى الجو دا خالص وممكن تكون بتحب تسمع من تاء التأنيث وقلت خلاص بلاه كاظم ونزار نقلب على الست سومه(ام كلثوم) وروحت اترجتها وبوست آهاتها قبل ياليل ياعين والست من صهلالتها ونقاء حنجرتها وصفتلى الروشته التمام وقلتلى عليكى بدول من مكتبة صوت القاهرة = امل حياتى والحب كله وسيرة الحب انت الحب فكرونى بس الحقيقه الكلام الفاضى والرومانسيه والدلع كأننا بننفخ فى قربه مقطوعه
وبدأت استعد للجوله القادمه وهاجرب المره الجايه طريقة النو هاو
الحلقة الجايه لو عايزين تعرفوها تابعوا معانا الفرقعه الكبيره تابعوا معايا

ملحوظة:
كما اوضحنا سابقا الفرق بين الحب والاحتياج للحب
نذكر اليوم الاشباع الروحى و النفسى والاشباع الجنسى واقصد تاثيرهما على الناحية النفسية والمزاجية للزوجين
عزيزى الرجل انت كل الحياه بالنسبه للمرأة المحترمه والمحبه وقد منحك الله القوامه بمافيها من احتواء للمراة وحنانك عليها فمتطلباتها العاطفيه والنفسيه قبل الجسديه حقا لابد ان تؤديها بالشكل الذى يرضيها لان هذا سيعود عليك مره اخرى من حب ولهفة وسرعة استجابه وهدوء وانسجام
عزيزى الرجل قد جعل الله علاقتك بالمرأة ميثاق غليظ وجعلها موده ورحمه وامرك ان تعاشرها بالمعروف
والرجوله الحقيقية بكل معانيها تجعل الرجل حضن كبير للمرأة وسند قوى بدلا من ان تكون حياتها معه سجن كبير او قبر
فاسمح لى بهذه الكلمات فهى ليست نصائح بل تذكره وتنبيه فى وسط زحام حياتك ودلاله على مكانتك الرفيعه
وتعالوا اسمعوا معى انغام واحلى كلام ووووووتسمحلى اغير عليك
http://www.youtube.com/watch?v=nK8MP5azgeU&feature=related

الأربعاء، 20 أكتوبر، 2010

يوميات بنت مصرية على قدها 30




الزواج المبكر نفسيا وفكريا وثقافيا وعمريا (1)

الحب ربيع المراة تتفتح فيه جمالها وانوثتها وبلاهذا الحب هى ميته
بزمتكم مش بت مووووووزه
==============
هاتابع معاكم واقولوا لى ايه رايكم فى الحل اللى دماغى ساعتها وصله وبدات انفذه
فكرت انى اشرح للامير شارل واوضحله الشكل النهائى اللى عايزه اكون علية واوصل اليه من الجواز واسيب له الطريقة والادوات والاسلوب اللى هايتبعه وغيره ماهو مش معقول هاقوله الخطوات والطريقه كمان مش كفايه خيبة الامل اللى انا فيه
وكان تفكيرى ساعتها ان المفروض قبل مااعترض او انتقد اى حاجة فى الدنيا وكمان قبل مااطلب اى طلب لازم التمس الاعذار ولو منفعش دا كله اروح اشوف طريقة واضحة جدا اوصل بيها اللى انا عايزه للطرف التانى مثلا انا بدل مااشرح واقول انا عايزه الملح كذا والبهارات كذا ودرجة الحرارة كذا وحتى تقطيع الخضار قطع كبيره ولاصغيره وكمان هانسيب الخضار المستوى قطع ولاهانضربه فى الخلاط كل دا لم الجأ اليه وقلت احسن حاجه يشوف طبق الخضار امامه افضل من الكلام عشان الصورة توصل بسرعه وصح
وبمنتهى الصراحة وفى الجون لا مش فى الجون الصراحة يعنى ومافيش احسن منها رميت الكرة فى وش حارس المرمى وقلت انا عايزه تاثير شوربة الخضار يحول الطفلة الى موووزة وعروسة حلوه زى دى ووريته صوره يعنى عروسه تفيض بالانوثة والجمال مكياجها حب وفستانها رومانسية وعقلها هادىء ونفسها سعيدة مرتاحة وكانت صورة لعروسة لبسه فستان زفاف ابيض وفى اديها وردة بيضاء تقريبا زى اللى انتوا شيفينها فى بداية الحلقة مش زى العروسة الطفلة نور
ملحوظة:
زى ماقلنا ان كل انسان فى الدنيا له بصمه كذلك كل انسان له كيميا وله مزاج خاص به وخاصة فى العلاقة الحميمة وهذا من صنع الله وليس لاحد دخل بهذا الامر وكل رجل له طبع ومزاج وكمان كل انثى لها ماتسعد به
فلماذا لانعترف بهذا الامر ومن هنا ناتى بالحل الذى يتيح لنا فرص التواصل بين الرجل والمراة ويعرف بصمتها ومزاجها وتعرف هى بصمته ومزاجة
فهذا افضل بكثير من مايحدث فى مجتماعنا وفى كثير من البيوت ان المراة تختلق الاعذار وتبحث عن الاسباب لكى تبتعد عن لحظة اللقاء الحميم وكذلك الرجل يتهرب من حدوث هذا اللقاء ولو فرض وحدث فهو تأدية واجب ونداء للاحتياج البيولوجى او مراعاة للحقوق الشرعية ويكون بدون تجاوب وتظهر منتهى الالم ممايؤدى الى الاحباط والفشل وبالتالى كراهية الموضوع كله
ويبقى قائما عدم الاشباع وعدم الارتياح والشعور بالضيق والقلق والعصبية والنرفزة ويتصيد لها الاخطاء وهى لاتقبل منه كلمه وتتحول الحياه الزوجية لجحيم ولا احد منهم يفصح عن الحقيقة معتبرا ان هذا من الممنوعات وتلتزم الزوجه الصمت ويبدأ الزوج يبحث عن حلول وترتبط هذة الحلول بشخصية الزوج
اذا كان رجل صنع صينى او تيوانى (مثل المنتجات الصينية والتيوانى) سوف يتجه الى الحلول اللى انتوا عارفينها كلكم والفيديو كليب والفضائيات والطلاق ومصادقة النساء السيآت والنت والافلام واصحاب السوء والنتيجة خراب البيوت وضياع مستقبله كله فى بيته وعمله وانسى السعادة والنجاح تماما
اما اذا كان صناعة المانى او يابانى يبحث عن زوجة اخرى وهنا الرجال نوعين واحد يحدد احتياجاته ويصارح الزوجة الجديدة مباشرة قبل الزواج وبدون خجل ويتأكد منها ان لها نفس البصمة التى يبحث عنها والثانى يتزوج فقط ويكرر نفس المشكله
أليس من الاسهل والافضل ان يكون هناك حلول بان
نربى ابنائنا بشكل علمى صحيح ومنذ الصغر نثقف ونفهم حسب المرحله العمرية وحسب البيئة والمستوى الثقافى وفى اطار من الادب والاخلاق ومع التاكيد ان هذا امر اساسى فى الحياه وليس اوبشن زيادة
اما الكبار فنخلق قنوات للتواصل بين المتزوجين ونخلق لغة صراحة حوار وكل منا يهتم ببصمة التانى لان هذا يعنى السعادة فى الاسرة والنجاح فى العمل واقامة مجتمع قوى وتربية ابناء صالحين
وليس الموضوع صغار وكبار الموضوع زواج مبكر فكريا واجتماعيا ونفسيا وكليا وهاكرر تانى واقول محتاجين ثقافه بلاش الكلمه اللى بتزعل دى وانا من النهارده هاسميها تربيه انسانيه
وتعالوا اسمعوا صغيرة على الحب من سعاد حسنى
http://www.youtube.com/watch?v=zu3js2nhrOY

الثلاثاء، 19 أكتوبر، 2010

يوميات بنت مصرية على قدها 29






الزواج مؤسسة ضرورية لصحة المجتمع
الحلقات الاخيره اللى فاتت كنا نسينا نور وسيبناها شويه واتكلمنا عن حجات كتير فى علاقة الرجل بالمرأة بس دلوقتى هانرجع ونشوف اخبارها ايه ونشوف هاتقول ايه
انا نورعرفت ان الموضوع كله هايكون شوربة خضار زى ماحكيت لكوا يعنى من الاخر لازم افهم ان كل الوجبات هاتكون شوربة خضار ودا سبب لى شوية ازعاج نونو نونو مش كتير لانى كنت لسه فى الاول ومتحمسة اومال هاجيب العيال ازاى وعندى امل وعندى دماغ وعايزه اعمل بيت وحياه واعيش ودا دماغ كل الستات المصريات مهما كان عندها مصايب بتحافظ على بيتها ماهو دا اللى احنا اتربينا عليه فى البيوت الكبيرة والمحترمه ونويت افكر بشكل علمى واعتمد على نفسى بس فى حل مشاكلى وخاصه انها مشاكل حساسه لاحد هايسمع ولاحد هايحل
والله ياجماعة مش عيب شوربة الخضار دى اصح اكل وكله فيتامينات وهى الفطره بس الزواج المبكر فكريا وثقافيا ونفسيا دا مشكله كبيره وخاصة عند الرجل لازم يعرف اللى ليه واللى عليه لان المفروض ان نقطة البدايه من عنده
ولما لقيت الوضع كدا مع شوربة الخضار ومش معقول كل شوية هاهدده انى اجيبله الملح (والدى ) يظبطها وكمان كان صعب اكلم الملح تانى يظبط الموضوع ماهو مش معقول هاجيب الملح يعيش معانا وهاجيب بجاحة منين كل شوية عشان افتح الموضوع هى بصراحة كان شكلها بجاحة مع وقاحة بس كانت مغلفة بخجل وأدب وإحترام واختيار الالفاظ ومدخل الموضوع يعنى حاجه تخنق وكل دا طبعا من أجل الذات العليا لشوربة الخضار ونحافظ على الكينونه الذكوريه وكمان عشان إتربينا ان بنات الاصول يتصرفوا بحكمة وأدب وانتوا طبعا عارفين الحركات الفاضية دى اللى ملهاش لازمة والمفروض ندخل فى الموضوع على طول ونتواجه ونحل مشاكلنا افضل من النعام اللى مالى حياتنا
وخلاص قلت لنفسى اوكى ماشى موافقة على شوربة الخضار ماهو امر واقع
بس لازم شوية ملح احنا اللى نعمله وكمان تكون دافيه يعنى ماحدش يقولى هى باردة من التلاجة ولاحد يقلى بتغلى
وقفلت معايا على الاخر يعنى لازم اشوف حل فى موضوع شوربة الخضار والمشكله دى ان الموضوع دا ماينفعش فية استعانه بصديق خالص هنا مافيش اصدقاء ولا حتى جورج كرداحى والله ولا قنوات ال ام بى سى كلها بجلالة قدرها
وبدات افكر بشكل علمى مانتوا عارفين بتوع علوم دماغهم لسعه اخر حاجة ومش نافعين خالص و كنت عاملة زى العالم الجاهل (يطلب من العلم مأسرع اليه هواه) يعنى بإختصار كل اللى يهمنى من قناة فتافيت اللى فى دنية ربنا كلها واصناف الاكل اللى فى الدنيا هو صنف واحد بس هو شوربة الخضار وازاى اظبطها و مش مهم اى نوع تانى من الشوربة ولا اى صنف ماهو انا اتخصصت شوربة خضار وخلاص الحمد لله
وهاقلوكوا فكرت ازاى اولا ألتمست لشوربة الخضار السبعين عذر اللى امرنا دينا بيها وقلت احتمال هو كدا من كثرة زيارات اللى بيباركوا قصدى اللى جايين يتجسسوا على الفرش والموبيليا وشياكة البيت ولا هو عشة فراخ او احتمال خريج محو امية بس مافيش مانع نذاكر سوا وناخد البكلوريا كمان ومافيش مانع ناخد MBAواحتمال واحتمال او احتمال
الموضوع صعب ومخجل وكله كسوف حتى لو كدا الحياء مطلوب برضه مع انى ساعتها كنت انا الخجل نفسه بس يالا اوكى هانقول بيستحى ماهو الحياء كمان فى الرجاله بس دا بيكون وحش قوى لكن بيكون زى الحياء زينه لو كان فى المراة
بس الطريقة دى تخمينات واحتمالات مش عمليه وانا بحب العملى واجيب من الاخر يعنى سكاشن مش محاضرات
وفكرت فى عدة حلول لهذه المشكله حلول نار ولا تقولوا اوكازيون ولا بنحطم الاسعار قصدى الافكار وتابعوا معايا الحلقة الجاية نور عملت حل جامد لدرجة انها كسرت العارضة من الجون فى الملعب
ملحوظة:
اى مشكله بين الرجل والمرأة لابد من التماس الاعذار وافتراض حسن النيه اولا لان هذه العلاقه المفروض انها اقدس علاقة بشريه فى الدنيا كلها
والمشكله الكبيره فى مجتمعنا الزواج المبكر ليس مبكر سنا ولكن مبكر فكريا وثقافيا واجتماعيا بمعنى اننا حبسنا على البنت والشاب ومنعنا عنهم المعرفه والعلم وبعدين نقول يالا روحوا اتجوزوا وهنا يكمن الخطر اما ان الشاب على جهل وكل مالديه ماشاهده فى بيت اهله او معلومات مغلوطه من اصدقائه او انه كان عامل فلانتينو وماشى غلط ومعلوماته وخبراته مريضة ومشبوهه لان مصدرها اتجاهات خاطئة
ولكن مايجب عمله القاء الضوء من الاهل والتعليم على اهمية هذا الجانب فى حياتنا وليس بشكل ضد دينا وتقاليدنا ولكن فى اطار الهويه الاصيله لنا ولمجتمعنا
وبلاش نسمى الموضوع ثقافه جنسيه لان دا بيزعل الاسر خلينا نسميه تربيه مستقبليه تربيه زوجيه بس لازم يكون هناك حل لان فيه ناس عمرها بينتحر بسبب الجهل
واسمعوا احلى كلام حبيبى بيستحى
http://www.youtube.com/watch?v=tYBfG0vBR78

الأحد، 17 أكتوبر، 2010

يوميات بنت مصريه على قدها 28




همسه فى اذن المرأه بأسرار الرجل 28
المرأة الطيبة الذكية الحنونة ذات الجمال الأخاذ تعد بلا شك من أحلى وأجمل النعم التي قدمها الله سبحانه وتعالى رزق للرجل
===================
عرفتوا بقى ان كل واحد فينا يقدر يتفنن فى الاكله بتاعته لان الخضار كله واحد بس احنا اللى متعلمناش نفهم الامور دى ونتعلمها وعملنا عليها باس وورد (كلمة سر) كبيييييييرة ومش بتفتح الموضوع خالص بس المشكله ان احنا قربنا نكسر كلمة السر دى ولما تتكسر--ساعتها ربنا يستر علينا ومن الهاك والفيروس اللى هايحصل معانا يعنى لازم يكون عندنا نورتون ونوود عشان نحمى اللاب او الديسك بتاعنا اللى هى حياتنا ومجتمعنا
المجتمع المصرى والشرقى كان عايش فى عزلة وتحفظ ومره واحدة اتفتحت امامه كل السموات والنت والفضائيات مع ما فيه من كبت وتراكمات نفسيه واجتماعيه وبكده خلاص كلكوا عرفتوا النتيجة وللاسف بعض النساء او الرجال مع ضياع الاساس الدينى وقيم الاخلاق ومع حدة وصرامة العادات والتقاليد اصبحنا نلمس تفتت المجتمع بس مازال هناك النور والامل فى حياتنا كلنا وهو قربنا من الله وحبنا لبعض فى مجتمعنا والدفا اللى مازال بيميزنا عن غيرنا من البلاد الاخرى
لكن احنا هانتكلم على نوع واحد اللى كلنا نتمناه هو الرجل الطبيعى اللى يدرك معنى الرجوله واللى اتربى فى بيوتنا الطيبه
و بخط كبيييييييييير اعرفى عنه سر خطير ان له كهفه الخاص الذى ينزوى فيه احيانا يعنى فى الساعات اللى بتلاقيه ساكت وصامت وكانه فى عالم بعيد فلا تهمليه تماما فى هذه العزله وتقولى احسن ريح وارتاح ولاتفضلى تزنى فى دماغة زى الشنيور المصدى ولكن امسكى العصا من النص اخرجيه بطريقه غير مباشرة مثلا اطلبى منه طلب يبين احتياجك له زى يجيى معاكى مكان مش ينفع تروحيه لوحدك او اطلبى منه مساعدتك فى عمل حاجة هو بيحبها بحجة انك مش عارفه يعنى اظهرى احتياجك له واهميته عندك
بس لما يطلع من كهفه والعزله دى براحتك على الاخر جهزى الشوك والسكاكين اللى فى مطبخ فتافيت كلها وبالهنا والشفا مش هاقولك بشويش عليه خلصى منه اللى قبل العزلة واللى بعدها واللى من يوم ماولدته الست حماتك
عزيزتى المراة اعلمى جيدا ان لكل رجل شخصيته الخاصة به ومزاجه وطريقته يعنى فيه اللى طعمه زى الكوسه الطريه ونوع زى الفلفل الحامى ونوع زى الخضار البايت ونوع زى الجزر الطازج السكرى ماتشبعيش منه ولامن حلاوة عشرته ونوع زى الطماطم بس ياترى طازج ويفتح النفس ويتعمل سلطة ولا مستوى ومنتهى الصلاحية ويترمى وآهو كله بيندرج تحت مسمى خضار وخلاص وانتى وحظك
واعلمى ان لكل رجل احساس معين يبحث عنه ليصبح سكنه وراحة باله واطمئنانه ويمتلك قلب تشرق منه شمسه عشان تضىء الحياه الزوجيه بالدفا والنور ولو دا حصل بترتيب القدر وكان من المكتوب علينا فيكون هذا رزق خصنا الله به وتبقى الحياه ساعتها الحياه بقه لونها بمبى بمبى بمبى شغل وبيت حتى هايشوف الاسعار فى مصر بمبى والمواصلات بمبى وكل حاجه بمبى و كلمة بحبك فى ودنه تخلى للحياه معنى وتعطى طاقه له طاقه تخليه يمتلك الدنيا كلها ولا صيدليه ولاعطار ولا زرقا ولاصفرا وساعتها حتى لو فيه جرح او الم قديم كل الجراح هاتتداوى والأسى هايتنسى وهاتكونى أميره على قلبه – بس خلى بالك دا مش هايحصل الا لما تركزى معاه هو بس بعيد عن الناس وعن نصايحهم حتى لو اقربهم لكى صديقة او امك او اى حد من اهلك
واقول كمان ولاكفايه واللبيب بإشارة يفهم يا أصحاب الزكاوه كلها

ملحوظة :
من الاخر عايزه تعرفى مفاتيحه وتحطيها فى جيبك وتريحى دماغك وتوفرى النكد والانفصال والطلاق اعرفى هو محتاج منك دا
طيبه طيبة امه حنونه حنية حبه الاول ذكيه ذكاء صديقته جميله جمال معشوقته انا عارفه ان الحكايه مش سهله بس اللى بيحب بيعمل كل دا من غير مايحس بتعب ويارب الناس كلها تكون سعيده
وتعالوا اسمعوا احلى كلام لكل عاشق وطن
http://www.youtube.com/watch?v=8Nul7YV6KzQ&feature=related

الأربعاء، 13 أكتوبر، 2010

يوميات بنت مصرية على قدها 27




همسه اخيره (بعد الهمسه الاولى) فى اذن الرجل باسرار المراة

إذا أردت أن تتخذ فتاة من الفتيات زوجة لك.. فكن لها أباً وأماً وأخاً .. لأن التي تترك أباها وأمها وأخوتها لكي
تتبعك .. يكون من حقها عليك أن تري فيك رأفة الأب .. وحنان الأم .. ورفق الأخ..
المقوله اللى تحت الصورة جابت من الاخر وقالت ايه اللى بتنتظرة المراة من الرجل واللى المفروض يعاملها بيه بس الحقيقة والواقع هو ساعات مش بيعرف هى عايزه ايه او بتعمل كدا ليه لانه مش فاهم سيكولجيتها وهو له طبيعه وهى لها طبيعه فمثلا
وبخط كبيييييييييير هاقولك حاجة عن المرأة عشان تفهمها وتعذرها انها مثلا لاتمتلك نفس تركيز الرجل يعنى ممكن تكون بتكلمها فى موضوع وتفتح هى فى اربع خمس موضوعات مختلفين تماما ومش بتعرف تفصل ولابتهنج ولا عندها مفتاح اوف ولا مفتاح اون وريستارت معها مش بيجيب تيجة وفى الاخرتقولك انت الغلطان اللى مش بتحبها وتعبها وتصرخ فى وشك وتسيبك وتمشى عادى جدا وخد من دا كتير ممكن احكى لكوا امثله من هنا للصبح والاغرب انها بعد مازعلت منك وسبتك ومشيت بثوانى تلاقيها بتكلم صاحبتها فى التليفون وميته من الضحك ولا كأن حاجة حصلت وبتحكيلها عى الحلقة الاخيرة فى المسلسل ولو فكرت تحاول تروح عندها هاتاخد واحد وعشرين حقنه فى مستشفى غضة الكلب هههههه لان هى ساعتها بتكون فى حاله رفض ليك خالص ومش بتفرق بين ابو الليف ولينا شامميان
بس هاقولك بصراحة عدم التركيز دا جزء من تكونها من عند ربنا لان مطلوب منها تهتم بأمور كتيرة جدا خاصه بالزوج والبيت والابناء ونفسها والاهل والجيران والشغل وشوف كل بند من دول تحته كام بند وتحت اللى تحته كمان فهى لو ركزت كويس مش هاتعمل غير حاجة واحدة والباقى مع السلامه والحياه هاتقف يعنى هى معذورة ان مخها يكون عبارة عن شوية سلوك داخله فى بعضها وكل دا عشانك وعشان ولادك ياسى السيد وانت باشا ياباشا كفايه عليك تركز فى الشغل وتاء التانيث برة البيت وفى ميولدى وروتانا والنت طبعا انت هاتقطع نفسك سيبها ان شاالله تولع ههههههههه ماهى مرزوعه فى البيت هاتروح فين دى مؤبد ياعم لزقه لك
واخيرا ابوح لك بادق اسرارها انها تسعد كثيرا عندما تمنحها إسمك وتلقب بلقبك وتكون زوجة فلان اكثر من سعادتها بإسمها فى شهادة ميلادها واسم اسرتها وهذا لمكانتك الرفيعة عندها وماتنتظرة منك
اقول كمان ولاكفايه واللبيب بإشارة يفهم يأصحاب الزكاوه كلها
ملحوظة :
المفتاح الاخير =عايزة منك الاستقرار والاولاد : يعنى نجاحك فى عملك واخلاصك فى حبها ومشاركتها فى تربية اولادك يعنى تخلى عندك دم شويه وبلاش تعمل مش واخد بالك ساعات وترمى الدنيا عليها وتعمل عبيط وعنيك ماتشوفش اغنية غمازات انا بقول الاغنيه -
وتعالوا واسمعوا الكلام الحلو دا اغنية اليسا ع بالى
http://www.youtube.com/watch?v=s2g7nmgU_7c&feature=related

الاثنين، 11 أكتوبر، 2010

يوميات بنت مصرية على قدها 26




بيسألونى ايه حكاية شوربة الخضار ؟؟؟؟؟؟؟؟؟؟؟
الحلقة اللى فاتت اتكلمت عن شوربة الخضار --- بس احب اوضح شىء هام جدا ان شوربة الخضار فى الحلقات مقصود بيها الرجل او المرأة ومقصود بها اى نوع من عدم التوافق بين الرجل والمراة سواء كان عدم توافق عاطفى او عقلى او طبقى او فكرى يعنى زى مابنقول مافيش كيميا بينهم ومش مرتاحين مع بعض لسبب ما يعنى من الاخر مقصود بها عدم التوافق النفسى او الجنسى وهذا يرتبط بعدم الرغبة وعدم الاحساس وتكون الامور بينهم تأدية واجب أو احتياج بيولوجى (وزى مابتقول الحاجه اليسا وآهى عيشه والسلام ) وقد يمتد عدم التوافق الى عدم وجود صداقة بينهم واختلاف فى اسلوب الحياه ونمط التفكير وبالتالى يصل الامر بينهما الى عدم الاشباع النفسى والجنسى ودا يأخذهم بعيدا عن الصحة النفسية المطلوبة من الزواج وللزواج وبالتالى صراخ وعناد أوصمت واكتئاب والنتيجة انهيار العلاقات الزوجية وجبل من المشكلات النفسية والاجتماعية ولايبوح احد بالحقيقة وتستمر فى طى الكتمان
اضف الى ذلك انها مهما كانت جريئة فالخجل من طبعها تحتاج صبرك وحنانك عليها لتصل بها الى سعادتك انت --فهى تحتاجك و تريدك رومانسى وانيق طموح مهاب مجامل ويعتمد عليك ومنصت اليها وووووومخلص لاينظر لغيرها
والله لو دققت شويه فى كل ماتريدة المراة منك عزيزى الرجل فتتأكد انها تريد صالحك وان تكون انجح رجل فى عملك واسعد زوج فى بيتك ولما ذا تتناسى عزيزى الرجل ان الله كلفك بالقوامة والانفاق
فياعزيزى الرجل إعلم جيدا انك انت الاخ والزوج والحبيب والعاشق والاب والزميل والصديق انت الحياه كلها انت الامان انت الحماية انت الحب انت المستقبل انت الاولاد انت الكل بالنسبة للمرأة فهل تبخل عليها ان تحتويها فقط بكل معنى الاحتواء فهى خلقت من أجلك وخلقت لتكون شريكتك وخلقت لسعادتك فهل تبخل عليها
انت الذى يجعل الحياه حلوة ويجعلها مرة يعنى هاتكون الوان او هاتكون ابيض والاسود انت كل احلامها وانت كل امانيها وكل ماتطلبه ان تحافظ على وجودها فى قلبك
اقول كمان ولاكفايه واللبيب بإشارة يفهم يأصحاب الزكاوه كلها
http://www.youtube.com/watch?v=XWE5TRQODN0&feature=related
ملحوظة:
من الاخر عايز تعرف مفاتيحها وتحطها فى جيبك وتريح دماغك وتوفر الاكياس البلاستيك ومحاكم الاسرة اعرف هى محتاجة منك دا
المفتاح الاول =عايزه منك الحب والامان : يعنى الرومانسية والغزل والدلع والهدايا حتى لو ورده والاحتواء ولو مش بتعرف اتعلم ولو ماتعلمتش مثل عليها هى ليها يعنى حبيب او ازوج غيرك هاتروح له !!!
المفتاح الاخير = الحلقة القادمة وهو اللى الرجل والمرأة متفقين فى احتياجه

الخميس، 7 أكتوبر، 2010

يوميات بنت مصرية على قدها 25




وقفه بسيطة
هانرجع لشوربة الخضار لان الموضوع ياجماعة ان كل واحد فينا ممكن يكون شوربة خضار وممكن يكون حاجة تانية خالص من نفس مكونات شوربة الخضار بس العملية محتاجة شوية دماغ وذكاوووه ويحاول كل طرف يركز قوى فى اللى الطرف التانى محتاجة يعنى الجزرمثلا ممكن يكون عصير جزر منعش ومغذى وزى العسل من غير سكر وممكن يكون شوربة خضار والبطاطس انتوا عارفين ان كلنا بنحبها ممكن تكون صينية بطاطس باللحمة حد يقدر يقول حاجة --؟ وممكن تكون بيوريه طبعا ولاكلمه !! وممكن تكون مقلية هى بتبوظ الرجيم اه لكن كلنا بنموت فيها وكمان French Fries --وياسلام على ورقة البطاطس باللحمة -- وكمان ورقة البطاطس بالسمك – وسلطة البطاطس الفرنسيه اللى معاها تسكت خالص وتروح فى دنيا تانيه ::: ومش معقول حد يرفض الشيبسى بكل انواعها اللى بالجبن واللى بالشطة واللى واللى ولسه اللى بيعملوها بدلع هيفا دى بقة هاتكون شيبسى جامدة اخر حاجة وممكن تتاكل بالكيس كمان وآهى كلها بطاطس شوفتوا مش قلتلكوا
يعنى كل واحد لازم يحس بالطرف التانى وخاصة الحاجات اللى صعب نقولها او صعب نطلبها لان جمالها وحلاوتها هاتروح بالكلام ودا غير اننا مش ضامنين الطرف التانى هايفهم او لا او هايكون رد فعله ايه والحجات دى زى الاحساس بالرومانسية مثلا

فالرومانسيه هى مفتاح المرأة والمدخل الرئيسى لشخصيتها ربنا خلقها كدا حنونه عاطفيه فهى دايما فى حالة عطش لنقطة ندى مش نقطة مايه كمان من خطيبها او زوجها ومحطة الميه مش واخده بالها خالص ومكبرة الجمجمة ومهما قولنا ياناس ياهوه هنا حد عطشان نسمع لا دا بيستعبط وبعدين محطة الميه مش واخده بالها خالص ان من مهام وظيفتها انها تسقى ناسها بس للاسف مشغولة بالمكن والصيانة واخيرا العطشان دا يصاب باليأس والاحباط وكلامى هنا مقصود به عطش الروح وغياب الاحساس والكلمة الحلوة والتقدير ورسالة موبايل ومكالمة تليفون دقيقة يابخيل دى شركات الموبايل بيفكروا يطلعوا صدقه دقايق مجانيه للرومانسية

وكلكوا شوفتوا هوس الفتيات والنساء بأغانى كاظم سابقا وبالدراما التركية فى المسلسلات ومهند وتوى لايت الاجنبى وليه والسبب سمات الشخصية ورومانسية البطل وتمسكه بالاخلاق الرفيعة والاخلاص والتفانى من اجل حبيبته فالمرأة تتمنى لهفة مهند وكلمات نزار الجميله واداء كاظم والحانه الساحره اما توى لايت دا سيبه بعيد خالص عننا دا موضوع تانى فالمرأة تريد هذه الرومانسية والرقة لكن من زوجها والله مش عارفه ليه محطات الميه مصممين على التعالى والتجاهل لموضوع الرومانسية دا مع انه مجانى وليه بيعتبروه حاجه تافهه وهايفه والاكثر من دا كله ان بعض الرجال اصابه الغضب او الفزع او القلق من هذه المسلسلات وهذه الاغانى طيب وخايف ليه ماتجيب من الاخر واعمل زيه
والاصعب ان ماينفعش ان كل واحده تعمل كتالوج للى هى عايزاه من زوجها عشان هو يعاملها بيه ساعتها مش هاتفرح ولاتسعد بيه لانها هى عايزاه يفهم لوحده ويعرف الطريقة وشكل الحياه اللى هى بتحبها وساعتها هاتكون اسعد انسانه وهو مالى عنيها ودا يامحطة المية لو ماحصلش ماتقولش انها دايما ساكته وكئيبة وهاديه وبعدين نقول ممله والكلمه التانيه اللى كلكوا عارفينها من شركة ايديال للتلاجات اللى انت رئيس مجلس الادارة فيها ياريت تغير النشاط بتاع الشركة وبدل ماتعمل تلاجات اعمل سخانات اصل انت زودتها قوى –الكلام دا داخل كل امراة وبتقوله بتصرفاتها وعنيها وكلمتها لخطيبها او زوجها
وتعالوا اسمعوا احلى كلام من نانسى كانها بتقول
http://www.youtube.com/watch?v=VFYyhKSg0ss